Psa 5 | KYG | STEP | O, Ala kava nene, hu'na, ge'nimo afika alagepa huka afiyo. Naipafi'mo nagesa afifi hu'na ne'mauvanagi kaipamo namiyo.

Psalms 5

Netepi'mo nunumu hu'niya gemae

1 O, Ala kava nene, hu'na, ge'nimo afika alagepa huka afiyo. Naipafi'mo nagesa afifi hu'na ne'mauvanagi kaipamo namiyo. 2 Ala kini veka'nimo Goti'nimogae, hu'na, kagaefeke'mo nunumu huguva'mofe'mo keya ae'na ge hisuva ge'nimo afiyo. 3 Nagaemo muki afina'mo netepi'mo ge hisugeka afigane. O, Ala kava nene, hu'na, Netepi'mo nunumu hisuva ge'nimo'a kevemo haegekana hu'na kahaete'na ali'na maku hu'na kagegauve. 4 Kagaemo hosu kavafe'mo amuse huka no'atana Gotigamo mai'nane. Hosu kava'mo'a kagae kahaopale'mo alagi lokaeno ohanegaiye. 5 Apaki'apile'mo ali'a asaga nehaya vaya'mo kaulagale'mo he ti'a o'maigae. Kagaemo muki hosu kava'mo nehaya vaya'aife'mo alagi okahau'nigeka kaini huka ne'apatane. 6 Kagaemo aigofe gemo nehaya vaya'aina alika apago'ya lagauka apatalegane. Ala kava ne'mo'a vaya'mo nehapaya vaya'e humi ne'apataya vaya'efe'mo avenatu'na heno atalegekana huno ne'maiye.

7 Ani kava huka mai'nana'monanafa nagaefe'mo muki kahau huka ne'natana kavakaleti'mo nokafi'mo fale'na haiguve. Kagaefeke'mo koli hute'nae'mo aote mono nokamo agete'na mono huguve. 8 O, Ala kava nene, hu'na, kame vaya'nimo mai'naya'mofe'mo fatago kavakafi'mo nayate'mo alika navalelika uvo. Naulagamo kakale'mo alika api aika nato. 9 Lama gemo apavayafi'mo alagi ohane'niye. Apaipafi'mo hosu kava'age'mo hane'niye. Lugo'apimo kano kelimo ali'a halo ne'aigeno atu ne'aiya kano keligana huno hane'niye. Apavenafu'naleti'mo hapaisiya agufa gemo nehae. 10 O Gotiyo, hu'na, Vai'mo alika apamiyo. Alika apatalege'apao ani kava'mo hugune, hu'a apakesamo ne'afiya kavateti'mo asagau'a aiyo. Kagaetegamo hosu kava'mo hute'a gekamo ago amagi'a atale'naya'mofe'mo asole hosu kava'apifi'mo mai'nagi alika yaga auka apatalo.

11 Apatalegana'monanafa kagaefeke'mo, laha maegaiye, hu'a apakesamo ne'afiya vaya'mogi muki afina'mo alopa gefati'mo hute'a apamogaga aiyo, kagaemo alagepa hu'a maisayafe'mo aika apati kae'nana'mofe'mae. Kagikae'mo hapau apayamopafi'mo hapau'nisiya vaya'mogimo kagaepi'mo apamogaga aiyo. 12 O Ala kava nene, hu'na, kagaemo fatago vaya'mo hapa maesanage'a alagepa hu'a maigae. Kagaemo halegu'apigana huka faika ku aika apategane.